Një anketë online e kryer nga Klinika Universitare e Psikiatrisë në Maqedoni tregon se rreth 70% e qytetarëve përdorin një telefon ose ekran para se të bien në gjumë, ndërsa më shumë se 40% kanë pasur probleme me gjumin në tre muajt e fundit. Nga të anketuarit, 63% flenë 5-7 orë në natë, 11.6% më pak se 5 orë, dhe 22.8% flenë 7-9 orë. Kjo iniciativë është pjesë e muajit të ndërgjegjësimit për gjumin, i organizuar nga Shoqata Evropiane për Kërkimin e Gjumit, me qëllim rritjen e ndërgjegjësimit për rëndësinë e gjumit për shëndetin dhe mirëqenien. Ekspertët theksojnë se mungesa e gjumit ndikon negativisht në funksionet ekzekutive, përqendrimin dhe aftësitë psikomotorike, duke rritur rrezikun për gabime të rënda dhe çrregullime të shëndetit mendor si ankthi dhe depresioni.