Sezoni turistik në Shqipëri është hapur zyrtarisht me aktivitete festive në qytetin e Fierit, ku bregdeti i Darëzezës u mbush me vizitorë dhe pushues që shijuan muzikë live, gara me kuaj, sporte dhe ndeshje boksi. Gjatë gjithë verës, gjashtë plazhe publike në vijën bregdetare të Fierit do të jenë të monitoruara nga roje bregdetare për të garantuar sigurinë e pushuesve. Në Durrës, sezonin e çeli gara tradicionale e notit, ndërsa autoritetet lokale synojnë të promovojnë qytetin duke kombinuar turizmin bregdetar me atë kulturor përmes hapjes së dy muzeve të rëndësishëm. Përgatitjet për sezonin në Shëngjin vijojnë me fokus në pastrimin e hapësirave publike dhe përmirësimin e infrastrukturës, duke synuar promovimin e pasurive historike, kulturore dhe natyrore të zonës.