Me fillimin e muajit të shenjtë të Ramazanit, në Prishtinë do të ofrohet iftar falas çdo ditë në oborrin e xhamisë “Prof. Dr. Bedri Kamberi” në Lagjen e Spitalit. Kjo traditë e bukur vazhdon tashmë për të nëntin vit me radhë dhe është e hapur për studentë, familje në nevojë dhe çdo agjërues që dëshiron të ndajë iftarin. Hoxhë Labinot Maliqi ka bërë thirrje që të gjithë të kontribuojnë në këtë vepër të hajrit, duke dhuruar ushqim ose mjete financiare për të mbështetur këtë iniciativë. Kontributet mund të bëhen drejtpërdrejt në restorante, në arkën e xhamisë, përmes Western Union apo mënyrave të tjera, ndërsa theksohet se më e rëndësishme është që në sofrën e agjëruesve të ketë ushqim.