Muaji i Ramazanit, i nënti në kalendarin islam, ka nisur dhe miliona myslimanë në mbarë botën fillojnë agjërimin e tyre për rreth 30 ditë. Gjatë kësaj periudhe, besimtarët përmbahen nga ushqimi dhe pijet nga agimi deri në perëndim të diellit, duke konsumuar vetëm dy vakte: syfyrin para lindjes së diellit dhe iftarin pas perëndimit. Ramazani është më shumë se një ndalim ushqimi; ai përfaqëson një kohë reflektimi, përkushtimi ndaj Zotit, kërkim faljeje, lutje për udhëzim dhe angazhim në vepra bamirësie dhe solidaritet me të nevojshmit. Kulmi i këtij muaji është Nata e Kadrit, një natë me rëndësi të madhe shpirtërore, e cila përkon me dhjetëditëshin e fundit të Ramazanit dhe shënon momentin kur është zbritur Kurani.