Ozempic, ilaçi i miratuar për trajtimin e diabetit, po përdoret gjithnjë e më shumë në Kosovë për humbje peshe, edhe nga persona pa diabet apo obezitet të rëndë. Endokrinologu Genc Shala shpjegon se ky ilaç është efektiv në uljen e sheqerit në gjak dhe reduktimin e ndjenjës së urisë, por përdorimi i tij duhet të jetë i kufizuar vetëm për pacientët me indikacione të qarta mjekësore. Ai paralajmëron se përdorimi pa recetë dhe pa kontrolle mjekësore mund të shkaktojë efekte anësore serioze, përfshirë të vjella, dehidrim, probleme me veshkat dhe madje kancer të gjëndrës tiroide. Mjeku thekson se mënyra më e shëndetshme për dobësim mbetet ndryshimi i stilit të jetesës, ndërsa trajtimi me ilaçe duhet të jetë opsioni i fundit dhe i monitoruar nga specialistët.