Një studim i ri ka zbuluar se pijet e gazuara dietale janë po aq të dëmshme për shëndetin sa edhe ato me sheqer. Analiza përfshiu 1.2 milionë të rritur nga 14 studime të ndryshme, disa prej të cilëve u ndoqën për më shumë se 20 vite, gjatë të cilave u regjistruan 137,310 vdekje. Konsumimi i pijeve me sheqer artificial lidhej me një rritje prej 5% të rrezikut të vdekjes dhe 13% të sëmundjeve të zemrës, ndërsa konsumatorët e pijeve të gazuara, pa marrë parasysh nëse ishin dietale apo jo, kishin një rrezik 12% më të lartë për vdekje të parakohshme dhe 23% për sëmundje kardiake. Këto rezultate tregojnë se as pijet dietale nuk janë një alternativë më e sigurtë për shëndetin, duke sfiduar perceptimet e zakonshme mbi to.