Me përparimin e teknologjisë digjitale, rreziku për fëmijët nuk qëndron më vetëm jashtë shtëpisë, por edhe brenda saj, përmes pajisjeve të lidhura me internetin. Platforma Roblox, e njohur si një lojë e pafajshme për fëmijë, është kthyer në një terren ku grupe terroriste dhe ekstremiste përdorin taktika manipulimi, joshjeje dhe indoktrinimi për të rekrutuar dhe keqpërdorur të miturit. Në shumë vende të botës, përfshirë SHBA, Holandë, Filipine dhe Singapor, autoritetet kanë zbuluar raste alarmante të përdorimit të kësaj platforme për qëllime kriminale dhe terroriste, ndërsa në Kosovë janë evidentuar sinjale të ngjashme përmes mesazheve të dyshimta dhe përpjekjeve për kontaktim të fëmijëve.