Ekspertja e turizmit Helen Rolph ka rekomanduar Shqipërinë si një alternativë ideale për turistët britanikë që kërkojnë pushime verore me buxhet të kufizuar, duke e cilësuar atë më të përballueshme dhe më të afërt se Maldivet. Artikujt e botuar në mediat britanike “Express” dhe RTK theksojnë se fluturimi nga Londra në Shqipëri zgjat vetëm rreth tre orë, ndërsa biletat vajtje-ardhje kushtojnë mes 100 dhe 130 paund, krahasuar me 12 orë fluturim dhe çmime shumë më të larta për Maldivet. Riviera jugore shqiptare, me plazhet e Ksamilit dhe Sarandës, ofron ujëra kristal të pastër dhe peizazhe të mrekullueshme, duke u krahasuar me destinacione luksoze si Karaibet dhe Maldivet, por me kosto dhe distancë shumë më të ulët. Përveç plazheve, Shqipëria ofron edhe mundësi për aventurë në natyrë gjatë verës dhe dimrit në Alpet shqiptare, si dhe një trashëgimi kulturore të pasur, duke e bërë atë një zgjedhje më të sigurt dhe më tërheqëse për turistët në kushtet e rritjes së kostove dhe pasigurisë së udhëtimeve ndërkombëtare.