Logopedia Mirgena Preniqi thekson se gjeneratat që janë rritur pa telefona dhe rrjete sociale kanë pasur një fëmijëri më të shëndetshme, veçanërisht në aspektin e komunikimit, përqendrimit dhe zhvillimit emocional. Ajo shpjegon se mungesa e teknologjisë në fëmijëri ka lejuar më shumë ndërveprime reale, lojëra fizike dhe bashkëbisedime me familjen dhe bashkëmoshatarët. Preniqi paralajmëron se përdorimi i hershëm i telefonave dhe ekraneve po lidhet me probleme në zhvillimin e të folurit, vështirësi në përqendrim dhe komunikim. Ajo gjithashtu vlerëson se sot fëmijët shpesh e kanë ekranin si mësuesin e parë, një fenomen që konsideron të gabuar dhe shqetësues për zhvillimin e tyre.