Spitali i Përgjithshëm i Pejës ka bërë thirrje për kujdes të shtuar në ushqyerje gjatë festës së Bajramit, duke theksuar rëndësinë e balancës ushqimore në këtë periudhë festive. Në një njoftim në Facebook, spitali ka rikujtuar se tryezat e pasura gjatë festave mund të sjellin konsum të tepërt ushqimi, i cili mund të ndikojë negativisht në shëndet. Institucioni këshillon shmangien e porcioneve të mëdha, kufizimin e ëmbëlsirave dhe ushqimeve me yndyrë të lartë, si dhe konsumimin e mjaftueshëm të ujit gjatë ditës. Gjithashtu, spitali nënvizon rëndësinë e mbajtjes së një niveli të caktuar aktiviteti fizik për të ruajtur shëndetin gjatë festave.