Ekspertët e ushqyerjes paralajmërojnë se disa ushqime nuk duhet konsumuar me stomak bosh, pasi ato mund të shkaktojnë shqetësime të ndryshme shëndetësore. Frutat agrume, si portokallet dhe limonët, për shkak të aciditetit të lartë mund të shkaktojnë urth dhe acarim stomaku, veçanërisht tek personat me sistem tretës të ndjeshëm. Ushqimet e ëmbla, si çokollata dhe petullat, rrisin papritur nivelin e insulinës duke sjellë lodhje dhe mungesë energjie, ndërsa ushqimet pikante irritojnë mukozën e stomakut dhe mund të shkaktojnë dhimbje barku. Gjithashtu, perimet e papërpunuara dhe bananet nuk rekomandohen në mëngjes me stomak bosh, pasi ato mund të shkaktojnë probleme në tretje dhe çekuilibra minerale që ndikojnë në funksionin kardiovaskular.