Ministria e Shëndetësisë thekson rëndësinë e ushqyerjes me gji si mënyrën më natyrale dhe më të sigurt për të porsalindurit dhe foshnjat. Qumështi i gjirit ofron të gjitha lëndët ushqyese të nevojshme për rritjen dhe zhvillimin e duhur, forcon imunitetin dhe zvogëlon rrezikun nga shumë sëmundje, duke sjellë përfitime për nënën dhe fëmijën. Sipas rekomandimeve të OBSH-së dhe UNICEF-it, ushqyerja ekskluzive me gji duhet të vazhdojë gjashtë muajt e parë, ndërsa më pas të kombinohet me ushqimin plotësues deri në dy vjeç ose më gjatë, në përputhje me nevojat e fëmijës dhe dëshirën e nënës. Ministria angazhohet të mbështesë këtë proces përmes forcimit të institucioneve shëndetësore, edukimit të stafit dhe bashkëpunimit me familjet dhe komunitetin, duke e konsideruar ushqyerjen me gji një investim afatgjatë në shëndetin e brezave.