Agjencia e Menaxhimit Emergjent (AME) ka bërë thirrje për kujdes të shtuar me hyrjen e sezonit të verës, duke paralajmëruar për rrezikun e shtuar të zjarreve për shkak të temperaturave të larta. AME apelon që qytetarët të shmangin ndezjen e zjarreve në natyrë, hedhjen e mbeturinave të ndezura si cigaret, dhe të raportojnë menjëherë çdo vatër zjarri në numrat emergjent pa pagesë 112, 193, 192 dhe 194. Në reagim theksohet se zjarrvëniet e qëllimta apo nga pakujdesia janë vepra penale dhe sanksionohen me ligj, ndërsa qytetarët ftohen të ndihmojnë në shuarjen e zjarreve për të mbrojtur jetën, pronën, shtazët dhe ambientin. AME nxit ndërgjegjësimin dhe bashkëpunimin për parandalimin e tragjedive dhe ruajtjen e mjedisit natyror për brezat e ardhshëm.