Komuna e Istogut u përball sot me reshje të dendura shiu dhe breshri që shkaktuan dëme të konsiderueshme në kulturat bujqësore, duke prekur shumë fermerë dhe ekonomitë familjare. Kryetari i komunës, Ilir Ferati, e përshkroi situatën si katastrofale, veçanërisht në fshatin Kovragë, ku toka pjellore u shkatërrua pothuajse plotësisht. Ekipet e Drejtorisë së Bujqësisë dhe Emergjencave janë në terren për të evidentuar dëmet, ndërsa komisionet komunale do të fillojnë nesër në mëngjes vlerësimin e situatës. Pas përfundimit të këtij procesi, raporti do të dërgohet në Ministrinë e Bujqësisë dhe Komisionin Nacional, me shpresën për kompensim të pjesshëm të fermerëve të prekur.