Erërat e forta që kanë përfshirë vendin gjatë ditës së sotme kanë shkaktuar dëme të konsiderueshme në fushën sportive të FC Mitrovica, klub që garon në Ligën e Parë. Klubi njoftoi përmes faqes së tyre zyrtare në Facebook se dëmtimet kanë vështirësuar zhvillimin normal të stërvitjeve dhe aktiviteteve sportive. Për këtë arsye, FC Mitrovica i bën thirrje institucioneve përgjegjëse dhe sponsorëve të ndihmojnë në sanimin e shpejtë të fushës, që futbollistët dhe fëmijët të vazhdojnë stërvitjet në kushte të sigurta. Situata e krijuar kërkon ndërhyrje urgjente për të rikthyer normalitetin në aktivitetet sportive të klubit.