Gjatë ditës së martë, Prishtina u përball me erëra të forta që shkaktuan dëmtime materiale në kulme, drunj të rrëzuar dhe shtylla ndriçimi. Drejtori për Siguri dhe Emergjenca, Lulzim Fushtica, njoftoi se janë realizuar 17 intervenime emergjente nga ekipet e zjarrfikësve, policisë dhe ndërmarrjeve publike, duke përfshirë edhe zona rurale si fshati Prapashticë. Fatmirësisht, nuk ka pasur të lënduar, ndërsa dëmet materiale janë të vogla dhe do të sanohen shpejt. Institucionet janë në kontakt të vazhdueshëm me Institutin Hidrometeorologjik dhe nuk ka paralajmërime për erëra të reja në këtë moment.