Drejtoria e Bujqësisë në Rahovec ka bërë apel urgjent për fermerët që të marrin masa parandaluese për mbrojtjen e kulturave dhe infrastrukturës bujqësore, për shkak të paralajmërimeve për stuhi të forta, erëra të fuqishme, reshje intensive dhe mundësi për breshër në ditët në vijim. Në njoftimin e saj, drejtoria rekomandon përforcimin e serave, mbylljen e hapjeve, pastrimin e kanaleve kulluese dhe largimin ose fiksimin e materialeve që mund të dëmtohen nga era. Për kulturat në fushë të hapur, mundësitë për mbrojtje janë më të kufizuara, ndaj fermerët duhet të monitorojnë situatën dhe të sigurojnë sistemet e ujitjes dhe mbështetëset ku është e mundur. Drejtoria thekson se ndërmarrja e masave me kohë mund të zvogëlojë dëmet dhe u uron fermerëve sa më pak pasoja nga kjo valë e motit të keq.