Instituti Hidrometeorologjik i Kosovës ka paralajmëruar se gjatë fundjavës moti do të jetë kryesisht me diell dhe temperatura të larta, me vlera që arrijnë deri në 34 gradë Celsius. Megjithatë, në disa zona malore dhe ultësira priten zhvillime të vranësirave konvektive që mund të sjellin reshje afatshkurtra shiu, shkarkesa rrufesh dhe stuhi lokale. Kushtet biometeorologjike mbeten të pafavorshme për shkak të temperaturave të larta dhe rrezatimit ultraviolet, ndaj personat me sëmundje kronike, të moshuarit dhe fëmijët këshillohen të kufizojnë aktivitetet në ambientet e hapura gjatë orëve më të nxehta.