Moti i ditës së nesërme do të jetë kryesisht me diell dhe pjesërisht i vranët, me temperatura që do të arrijnë deri në 32°C, sipas Institutit Hidrometeorologjik të Kosovës. Era do të jetë e lehtë dhe me drejtime të ndryshme, duke krijuar kushte të favorshme për aktivitetet bujqësore. Kushtet agrometeorologjike janë optimale për pjekjen e drithërave, veçanërisht për shkak të motit të thatë dhe orëve të gjata me diell. Në prag të fushatës së korrje-shirjeve të grurit, kjo fundjavë është e përshtatshme për përgatitjen dhe nisjen e punimeve në arat me drithëra, ndërsa në rrafshin e Dukagjinit korrjet pritet të fillojnë rreth 10 ditë më herët se në rrafshin e Kosovës për shkak të kushteve klimatologjike më të favorshme.