Greqia ndodhet në një situatë alarmi për shkak të rrezikut të lartë të zjarreve, të nxitur nga erërat e forta dhe thatësira të vazhdueshme. Për 15 gushtin, 22 rajone janë në kategorinë 4 të rrezikut, ndërsa në 10 prej tyre është aktivizuar Kodi i Kuq, duke përfshirë Atikën, Kretën, Egjeun dhe rajone të tjera kyçe. Autoritetet kanë kërkuar mobilizim të plotë të strukturave të emergjencës dhe kanë ndaluar çdo aktivitet që mund të shkaktojë zjarr, duke përfshirë djegien e barit të thatë, përdorimin e fishekzjarrëve dhe qarkullimin në zonat më të rrezikuara. Parashikimet meteorologjike tregojnë erëra të forta që mund të arrijnë deri në 9 ballë të shkallës Beaufort, ndërsa temperaturat mbeten të larta, duke rritur më tej rrezikun e përhapjes së zjarreve. Autoritetet vazhdojnë monitorimin e situatës dhe paralajmërojnë se erërat pritet të dobësohen gjatë mbrëmjes.