Java 6-10 korrik në Kosovë do të karakterizohet nga mot kryesisht me diell dhe vranësira të herëpashershme, me temperatura që do të arrijnë deri në 30°C. Të hënën dhe të martën priten reshje lokale të izoluara, ndërsa pjesa tjetër e javës do të jetë me mot të qëndrueshëm, i përshtatshëm për aktivitetet e përditshme dhe punimet bujqësore, përfshirë korrje-shirjet e grurit. Kushtet agrometeorologjike do të jenë përgjithësisht të favorshme, megjithatë reshjet e lehta nuk do të jenë të mjaftueshme për nevojat ujore të bimëve, ndaj fermerëve u rekomandohet të vazhdojnë ujitjen, sidomos të kulturave perimore. Temperaturat e freskëta gjatë mëngjesit dhe mbrëmjes, si dhe mungesa e vapës ekstreme, pritet të ndikojnë pozitivisht në mirëqenien e qytetarëve, të cilëve u këshillohet hidratim i rregullt dhe shmangie e ekspozimit në diell gjatë orëve me rrezatim të lartë UV.