Java e re në Kosovë nis me mot të qëndrueshëm dhe diell, me temperatura minimale nga 7 deri në 11 gradë Celsius dhe maksimalet deri në 23 gradë. Megjithatë, nga e marta priten reshje lokale shiu dhe rënie e temperaturave, ku moti do të jetë i ndryshueshëm me intervale dielli dhe vranësira, duke sjellë edhe shkarkime elektrike në disa zona. Gjatë ditëve në vijim, temperaturat do të bien gradualisht, ndërsa reshjet e dobëta të shiut do të vazhdojnë në disa vende. Instituti Hidrometeorologjik i Kosovës thekson se kushtet mbeten të favorshme për bujqësi, por rekomandon që trajtimet me preparate mbrojtëse të bëhen në periudha pa reshje dhe me erëra të dobëta.