Ministria e Infrastrukturës dhe Transportit ka vendosur sërish kufizim të përkohshëm për automjetet e transportit të mallrave me masë mbi 20 tonë në autoudhë, për shkak të temperaturave të larta që pritet të arrijnë mbi 32 gradë Celsius. Kufizimi do të jetë në fuqi nga ora 11:00 deri në 17:30, duke lejuar lëvizjen e këtyre automjeteve vetëm në rrugët nacionale, rajonale dhe lidhëse pa kufizime. Nga masa përjashtohen automjetet e organeve të rendit, shërbimeve emergjente dhe institucioneve shëndetësore, të cilat do të qarkullojnë normalisht. Ministria i ka bërë thirrje operatorëve dhe ngasësve që të respektojnë orarin e kufizimit dhe të planifikojnë qarkullimin në përputhje me këtë vendim për të shmangur probleme gjatë ditës.