Ministria e Infrastrukturës dhe Transportit ka vendosur një kufizim të përkohshëm për automjetet e transportit të mallrave me masë mbi 20 tonë në autoudhë. Ky kufizim do të jetë në fuqi sot nga ora 11:00 deri në 17:30, për shkak të temperaturave të larta që pritet të arrijnë ose kalojnë 32 gradë Celsius. Në rrugët nacionale, rajonale dhe lidhëse, qarkullimi i këtyre automjeteve do të vazhdojë pa kufizime, ndërsa përjashtohen automjetet e organeve të rendit, shërbimeve emergjente dhe institucioneve shëndetësore. Ministria ka bërë thirrje që operatorët dhe drejtuesit të respektojnë këtë kufizim dhe të planifikojnë udhëtimet sipas orarit të përcaktuar.