Ministria e Infrastrukturës dhe Transportit ka njoftuar kufizime të përkohshme në qarkullimin e automjeteve të transportit të mallrave me peshë mbi 20 tonë. Këto kufizime do të vlejnë në autostrada nga ora 11:00 deri në 17:30, për shkak të temperaturave të larta të parashikuara për ditën e nesërme. Në rrugët nacionale, rajonale dhe lidhëse, qarkullimi i këtyre automjeteve do të vazhdojë pa kufizime, ndërsa përjashtohen automjetet e organeve të rendit, shërbimeve emergjente dhe institucioneve shëndetësore. Ministria u ka bërë thirrje operatorëve dhe shoferëve të respektojnë oraret e përcaktuara dhe të planifikojnë lëvizjet në përputhje me masat e reja.