Ministria e Infrastrukturës dhe Transportit ka njoftuar vendosjen e një kufizimi të përkohshëm për automjetet e transportit të mallrave me masë mbi 20 tonë në autoudhë, për shkak të temperaturave të larta që pritet të arrijnë ose tejkalojnë 32 gradë Celsius. Kufizimi do të jetë në fuqi nga ora 11:00 deri në 17:30 dhe do të aplikohet vetëm në autoudhë, ndërsa në rrugët nacionale, rajonale dhe lidhëse qarkullimi do të vazhdojë pa kufizime. Nga masa përjashtohen automjetet e Policisë, institucioneve të sigurisë publike, shërbimeve emergjente dhe institucioneve shëndetësore. Ministria ka bërë apel për operatorët ekonomikë dhe drejtuesit e automjeteve që të respektojnë orarin e kufizimit dhe të planifikojnë lëvizjet në përputhje me këtë vendim.