Ministria e Infrastrukturës dhe Transportit ka vendosur kufizime të përkohshme për qarkullimin e kamionëve me peshë mbi 20 tonë në autoudhë gjatë ditëve me temperatura të larta, nga ora 11:00 deri në 17:30. Kjo masë synon të mbrojë infrastrukturën rrugore nga dëmtimet e mundshme për shkak të ngarkesës së rëndë në kushte të nxehtësisë ekstreme, ku temperaturat pritet të arrijnë ose tejkalojnë 32 gradë Celsius. Kufizimi nuk aplikohet në rrugët nacionale, rajonale dhe lidhëse, dhe përjashtohen automjetet e organeve të rendit, shërbimeve emergjente dhe institucioneve shëndetësore. Ministria i ka bërë thirrje operatorëve ekonomikë dhe drejtuesve të automjeteve të respektojnë orarin e kufizimit dhe të planifikojnë lëvizjet në përputhje me rregullat e reja.