Ministria e Infrastrukturës dhe Transportit ka njoftuar se nesër do të ketë kufizime të përkohshme në qarkullimin e automjeteve të transportit të mallrave me masë totale mbi 20 tonë në autoudhë. Kufizimi do të jetë në fuqi nga ora 11:00 deri në 17:30, për shkak të parashikimit të temperaturave të larta që pritet të arrijnë 32 gradë Celsius ose më shumë. Qarkullimi i këtyre automjeteve do të lejohet pa kufizime në rrugët nacionale, rajonale dhe lidhëse, ndërsa përjashtohen automjetet e organeve të rendit, shërbimeve emergjente dhe institucioneve shëndetësore. Ministria ka bërë thirrje që operatorët ekonomikë dhe ngasësit të respektojnë kufizimet dhe të planifikojnë qarkullimin sipas orarit të përcaktuar.