Ministria e Infrastrukturës dhe Transportit ka njoftuar vazhdimin e kufizimit të përkohshëm të qarkullimit për automjetet e transportit të mallrave me peshë mbi 20 tonë në autoudhë. Ky kufizim do të jetë në fuqi sot nga ora 11:00 deri në 17:30, për shkak të parashikimit të temperaturave të larta prej 32 gradë Celsius e më shumë. Në rrugët nacionale, rajonale dhe lidhëse, këto automjete do të qarkullojnë pa kufizime, ndërsa përjashtohen automjetet e organeve të rendit, shërbimeve emergjente dhe institucioneve shëndetësore. Ministria ka bërë thirrje që operatorët dhe ngasësit të respektojnë orarin e përcaktuar dhe të planifikojnë qarkullimin në përputhje me këtë vendim.