Policia e Shtetit në Shqipëri ka paralajmëruar për përkeqësim të motit gjatë datave 24 dhe 25 korrik 2026, duke bërë apel për kujdes maksimal në det dhe në rrugë. Mjetet e vogla lundruese dhe ato të peshkimit që operojnë jashtë Gjirit të Vlorës dhe Gjirit të Sarandës, si dhe përgjatë vijës bregdetare Dhërmi–Himarë–Sarandë, këshillohen të shmangin daljet në det për shkak të kushteve të pafavorshme hidrometeorologjike. Policia u bën thirrje drejtuesve të mjeteve lundruese të vlerësojnë situatën dhe të shmangin çdo veprim që mund të rrezikojë jetën e tyre dhe të personave në bord. Gjithashtu, apelohen drejtuesit e automjeteve dhe motomjeteve të respektojnë rregullat e qarkullimit, kufijtë e shpejtësisë dhe distancën e sigurisë, ndërsa këmbësorët duhet të tregojnë vëmendje të shtuar gjatë lëvizjes në kushte reshjesh apo lagështie për të shmangur aksidentet.