Instituti Kombëtar i Shëndetësisë Publike të Kosovës (IKSHPK) ka bërë apel për kujdes të shtuar gjatë periudhave me temperatura të larta, duke theksuar rreziqet serioze që vapa mund të sjellë për shëndetin, sidomos tek fëmijët, të moshuarit dhe personat me sëmundje kronike. Qytetarët këshillohen të pinë ujë shpesh, të shmangin pijet me sheqer dhe alkool, të qëndrojnë në hije dhe të kufizojnë daljet në diell gjatë orëve më të nxehta të ditës, nga ora 11:00 deri në 17:00. Po ashtu, rekomandohet veshja e rrobave të lehta dhe me ngjyra të hapura, përdorimi i kremit mbrojtës nga dielli dhe syzeve, si dhe kujdesi i veçantë për të moshuarit dhe shmangia e lënies së fëmijëve në automjete, ku temperatura rritet shumë shpejt. Në rast shfaqjeje të simptomave si marramendje, lodhje apo dhimbje koke, qytetarët duhet të kërkojnë menjëherë ndihmë mjekësore për të parandaluar pasoja serioze nga goditja nga nxehtësia.