Europën Perëndimore po e përfshin një valë e pazakontë të nxehti që po thyen rekorde temperaturash dhe po shkakton viktima. Fenomeni kryesor që qëndron pas këtyre temperaturave ekstreme është “kupola termike”, një zonë e madhe presioni të lartë atmosferik që bllokon ajrin e nxehtë poshtë dhe pengon reshjet, duke rritur ndjeshëm temperaturat. Në Britaninë e Madhe, 11 persona kanë humbur jetën, ndërsa në Francë janë raportuar shtatë viktima dhe janë vendosur masa emergjente për të kufizuar trafikun dhe ndotjen. Edhe Spanja, Portugalia dhe Italia po përjetojnë temperatura historike dhe paralajmërime të forta për rrezik shëndetësor në qytetet kryesore.