Shqipëria do të përballet sot me kushte atmosferike relativisht të paqëndrueshme, me alternime kthjellimesh dhe vranësirash mesatare deri të dendura, sidomos në relievet malore në lindje. Gjatë mesditës dhe pasdites, në zonat veriore, qendrore dhe malore në lindje e jug do të ketë reshje shiu të herëpashershme me intensitet të ulët, ndërsa në relievet e larta reshjet mund të shfaqen edhe në formën e shtrëngatave afatshkurtra. Era do të fryjë kryesisht nga jugperëndimi dhe juglindja me shpejtësi mesatare 6 m/s, duke arritur deri në 14-17 m/s përgjatë vijës bregdetare dhe zonave luginore. Valëzimi në detet Adriatik dhe Jon do të jetë me forcë 3-4 ballë, duke krijuar kushte të ndryshueshme në mjedisin atmosferik dhe detar.