Shqipëria do të përballet me një ditë me mot të paqëndrueshëm, ku vranësirat dhe reshjet e shiut do të jenë prezente që në orët e para të ditës. Fillimisht reshjet do të jenë më intensive në veriperëndim, me shtrëngata, stuhi dhe shkarkesa elektrike, ndërsa gradualisht do të përfshijnë edhe zonat e veriut dhe qendrës me intensitet më të ulët. Gjatë mesditës reshjet do të përfshijnë pjesën më të madhe të vendit, ndërsa në pasdite ato do të lokalizohen kryesisht në zonat malore dhe do të ndërpriten në mbrëmje. Era do të fryjë nga jugperëndimi me shpejtësi mesatare 8 m/s, duke arritur deri në 20 m/s në bregdet dhe zonat luginore, ndërsa valëzimi në det do të jetë i forcës 2-4 ballë.