Më 23 mars, Shqipëria do të përjetojë mot të paqëndrueshëm me vranësira mesatare deri të dendura dhe reshje shiu të herëpashershme. Reshjet do të fillojnë në orët e para të ditës në Ultësirën Perëndimore me intensitet të ulët dhe gradualisht do të përhapen në pjesën tjetër të vendit, duke sjellë edhe shtrëngata afatshkurtra kryesisht në zonat malore. Në orët e mbrëmjes reshjet do të dobësohen, duke mbetur të dobëta në jug dhe në veri-lindje në male. Në lartësitë mbi 1000-1200 metra në veri-lindje dhe jug-lindje priten reshje dëbore me intensitet të ulët, ndërsa era do të fryjë me drejtim verilindje-veriperëndim me shpejtësi mesatare 5 m/s dhe deti do të jetë i qetë me forcë valëzimi 1-2 ballë.