Ditën e shtunë, Shqipëria do të përjetojë kushte atmosferike të paqëndrueshme me vranësira mesatare deri të dendura dhe alternime kthjellimesh. Reshjet e shiut do të jenë të herëpashershme dhe me intensitet kryesisht të ulët, duke filluar që në orët e para të ditës përgjatë vijës bregdetare dhe duke u përhapur në pjesën më të madhe të territorit gjatë mesditës, me shtrëngata afatshkurtra në zonën perëndimore. Në zonën e Alpeve do të ketë reshje dëbore me intensitet të ulët deri mesatar në lartësitë mbi 400-500 metra në verilindje dhe mbi 700-1000 metra në lindje-juglindje. Era do të fryjë nga verilindja-veriperëndimi me shpejtësi mesatare 7-8 m/s, duke arritur herë pas here deri në 15-17 m/s në lugina dhe përgjatë vijës bregdetare, ndërsa valëzimi në detet Adriatik dhe Jon do të jetë 2-5 ballë.