Meteorologu Mendim Rugova ka paralajmëruar se vala e nxehtësisë ekstreme që po përfshin Evropën perëndimore dhe qëndrore po afrohet drejt Kosovës dhe rajonit. Sipas tij, temperaturat në vend pritet të arrijnë deri në 37 gradë Celsius në rrafshin e Kosovës dhe deri në 39 gradë në rrafshin e Dukagjinit, me mundësi që lokalisht të kapin edhe 40 gradë. Kjo temperaturë mund t’i afrohet ose të kalojë rekordin e muajit qershor të vitit 1982, kur në Prizren u regjistruan 40.6 gradë Celsius. Në rajon, vendet si Mali i Zi dhe Shqipëria pritet të shënojnë edhe temperatura më të larta, deri në 42-43 gradë Celsius, duke treguar një situatë të rëndësishme klimatike për javët në vijim.