Rreziku nga ortekët është rritur në Alpet Shqiptare pas reshjeve të dendura të dëborës dhe erërave të forta që kanë përfshirë zonën verilindore të vendit. Një grup prej 40 alpinistësh nga Kosova, të cilët po eksplorojnë Alpet Shqiptare dhe Luginën e Valbonës prej tre ditësh, janë përballur nga afër me këtë fenomen natyror. Ata kanë filmuar momentin kur një ortek i fuqishëm është shkëputur nga maja e Briasit në lartësinë 2,570 metra dhe ka zbritur me shpejtësi drejt luginës, duke krijuar një re të dendur bore që ka mbuluar zonën përreth. Fatmirësisht, në këtë zonë nuk ka banesa dhe nuk raportohet për persona të lënduar apo dëme materiale, megjithatë autoritetet kërkojnë vëmendje të shtuar për sigurinë e banorëve dhe turistëve në këtë rajon.