Instituti Hidrometeorologjik i Kosovës (IHMK) ka paralajmëruar për reshje lokale shiu dhe bore gjatë fundjavës si pasojë e depërtimit të masave ajrore të lagështa dhe jostabile. Temperaturat minimale do të lëvizin nga 1°C deri në 4°C, ndërsa maksimalet nga 6°C deri në 12°C, me mot të paqëndrueshëm dhe vranësira të herëpashershme në pjesën më të madhe të vendit. Nga data 31 mars deri më 4-5 prill pritet rënie e temperaturave minimale në vlera negative gjatë orëve të hershme të mëngjesit, duke krijuar kushte për ngrica pranverore që mund të dëmtojnë rëndë kulturat bujqësore, veçanërisht pemët në fazën e lulëzimit. IHMK ka dhënë rekomandime për fermerët, duke sugjeruar krijimin e shtresës mbrojtëse me tym, monitorimin e temperaturave dhe ndërmarrjen e masave të duhura për të zvogëluar dëmet në prodhimin bujqësor.