Agjencia e Menaxhimit Emergjent (AME) ka njoftuar se situata pas reshjeve të shiut të ditës së sotme në Kosovë është stabile, e qetë dhe plotësisht e menaxhueshme në të gjitha rajonet e prekura. Në zonën Gjakovë–Rahovec, niveli i ujërave është në rënie dhe janë sanuar dëmet në objekte banimi dhe shtretër lumenjsh, përfshirë fshatin Pataqan i Ulët, ndërsa në Prizren dhe Suharekë janë trajtuar me sukses rastet e depërtimit të ujit në podrume dhe lokale afariste. Në Prishtinë, ekipet emergjente kanë ndërhyrë për të normalizuar qarkullimin në zonat ku uji ishte grumbulluar, si Shkabaj dhe autostrada Prishtinë–Shkup pranë Marigona Residence. AME vijon të mbajë koordinim të ngushtë me Policinë e Kosovës, autoritetet komunale dhe Qendrën Operative të Ministrisë së Punëve të Brendshme, duke qëndruar në gatishmëri të plotë për çdo zhvillim të mëtejshëm dhe apelon qytetarët të kontaktojnë numrin pa pagesë 112 në rast emergjence.