Reshjet e rrëmbyeshme kanë shkaktuar përmbytje të mëdha në distriktin Havza të provincës Samsun, pranë Detit të Zi në Turqi, duke përmbytur shtëpi, biznese dhe duke marrë me vete automjete. Të paktën 12 persona janë lënduar lehtë dhe janë shtruar në spital, ndërsa autoritetet raportojnë se asnjë prej tyre nuk ndodhet në gjendje të rëndë. Pamjet dramatike tregojnë banorë të bllokuar, përfshirë një shofer që priste shpëtimin mbi një kamion, ndërsa ekipet e emergjencës punojnë intensivisht për shpëtimin dhe pastrimin e zonës. Zjarrfikësit, policia dhe ekipet civile janë angazhuar për të ndihmuar banorët dhe për të përballuar pasojat e përmbytjeve të shkaktuara nga dalja e lumenjve nga shtrati.