Autoritetet meteorologjike në Zvicër kanë paralajmëruar për reshje intensive bore gjatë fundjavës, me deri në 90 centimetra borë të re në kantonin Ticino, ku është shpallur niveli i rrezikut 4 nga 5. Përveç Ticinos, disa kantone të tjera si Schwyz, Lucerne, Graubünden, Valais, Bern, Glarus, Uri, Nidwalden, Obwalden dhe Zug janë në nivel alarmi 3, me reshje deri në 80 centimetra borë. Reshjet e dendura pritet të sjellin rreziqe shtesë, përfshirë rrëzimin e degëve dhe pemëve nga pesha e borës, duke krijuar pengesa në rrugë dhe rrezik për banorët. Autoritetet u bëjnë thirrje qytetarëve të tregojnë kujdes gjatë lëvizjes dhe të ndjekin përditësimet meteorologjike deri të dielën në mesditë, kur pritet të përfundojë paralajmërimi.