Sipas Qendrës për Menaxhim me Kriza, pothuajse i gjithë territori i Maqedonisë së Veriut është në zonën me rrezik të lartë nga zjarret, përveç disa rajoneve si Mali Sharr dhe rrethina e Ohrit dhe Resnjës ku rreziku është mesatar. Në 24 orët e fundit janë regjistruar 29 zjarre në hapësira të hapura, prej të cilave gjashtë janë ende aktive dhe një është nën kontroll. Zjarret aktive po shfaqen në disa komuna të ndryshme, duke përfshirë Studeniçan, Makedonski Brod, Veles, Zelenikova, Jegunoc, Saraj, Prilep dhe Dollnen. Autoritetet bëjnë apel për kujdes maksimal dhe sjellje të përgjegjshme, duke kërkuar që qytetarët të mos përdorin zjarr në natyrë dhe të raportojnë menjëherë çdo zjarr në numrin 112.