Pas reshjeve të fundit të borës dhe erërave të forta, Shoqata e Kërkim-Shpëtimit Malor të Kosovës (ShKShMK) ka paralajmëruar për rritjen e rrezikut nga ortekët në zonat malore të vendit. Ajo ka bërë thirrje urgjente për qytetarët, skitarët dhe bjeshkatarët që të tregojnë kujdes të shtuar dhe të shmangin aktivitetet jashtë pistave të rregulluara për shkak të rrezikut të lartë të rrëshqitjes së borës. Bjeshkatarët këshillohen të mos lëvizin në faqe malore me pjerrësi 30° deri në 45°, si dhe të shmangin ecjet pranë kreshtave dhe luginave që mund të jenë në trajektoren e ortekëve. Autoritetet kanë vënë në dispozicion numrin e emergjencës së ShKShMK për çdo situatë të rrezikshme.