Zëvendësministri i Punëve të Brendshme, Enver Dugolli, vizitoi Agjencinë e Menaxhimit të Emergjencave (AME) për të diskutuar situatën e zjarreve gjatë sezonit të verës. Gjatë takimit u theksua se deri tani situata është e qetë, por rritja e temperaturave rrit edhe rrezikun nga zjarret, duke kërkuar vigjilencë dhe gatishmëri të shtuar nga ekipet zjarrfikëse dhe bashkëpunim të ngushtë me komunat. Një nga shkaktarët kryesorë të zjarreve mbetet djegia e hamulloreve, një praktikë e papërgjegjshme që rrezikon jetën, pronën dhe mjedisin. AME dhe Policia e Kosovës do të monitorojnë me kujdes këtë fenomen dhe do të marrin masa të rrepta ndaj keqbërësve, ndërsa qytetarët u bëhen thirrje të tregojnë kujdes maksimal dhe të raportojnë çdo rrezik të mundshëm.