Kompania Rajonale e Ujësjellësit “Prishtina” ka njoftuar për një rritje të ndjeshme të konsumit të ujit të pijshëm gjatë periudhës së verës, duke bërë thirrje për përdorim të kujdesshëm dhe racional të këtij burimi jetik. Edhe pse nivelet e ujit në liqenet akumuluese janë të mira dhe furnizimi është stabil, rritja e temperaturave dhe keqpërdorimet po rrezikojnë furnizimin e qëndrueshëm. Zëdhënësja Arjeta Mjeku ka apeluar që të evitohet përdorimi i ujit të pijshëm për ujitje të oborreve, larje të rrugëve apo mbushje të pishinave, si dhe ka theksuar se kyçjet ilegale po shkaktojnë probleme serioze në furnizim. Inspektorët identifikojnë çdo ditë dhjetëra raste të abuzimit me ujë, duke vënë në rrezik furnizimin për familjet, bizneset dhe institucionet, ndaj bashkëpunimi i qytetarëve është thelbësor për ruajtjen e këtij burimi.