Rezervat e ujit në akumulimet kryesore të Kosovës, si Liqeni i Batllavës dhe ai i Badovcit, mbeten në nivele që garantojnë furnizimin me ujë deri në fund të vitit 2026. Sipas Kompanisë Rajonale të Ujësjellësit ”Prishtina”, niveli i ujit është respektivisht 1.69 dhe 2 metra nën nivelin maksimal të mbushjes, duke siguruar kështu qëndrueshmërinë e furnizimit për periudhën në vijim. Megjithatë, ekspertët theksojnë se kjo siguri varet shumë nga përdorimi racional dhe menaxhimi i kujdesshëm i ujit, sidomos gjatë periudhave me temperatura të larta dhe konsum të shtuar. Ata paralajmërojnë se përdorimi i panevojshëm mund të ndikojë negativisht në rezervat dhe në stabilitetin e sistemit të furnizimit, duke bërë që përgjegjësia për ruajtjen e ujit të jetë e përbashkët për të gjithë qytetarët.