Instituti Hidrometeorologjik i Kosovës njoftoi se gjatë ditës së djeshme disa zona të vendit u përballën me reshje shumë intensive, të shoqëruara me shkarkime rrufesh dhe breshër. Situata më e rënduar u regjistrua në zonën e Llapit, në fshatin Shajkoc, ku vetëm brenda një ore reshjet arritën deri në 28.2 mm, një sasi e konsideruar shumë e lartë për një interval kaq të shkurtër kohor. Në një distancë prej vetëm 1 km, reshjet ndryshuan ndjeshëm, duke shënuar 15.8 mm në një pikë dhe 28.2 mm në një tjetër. Kjo situatë u regjistrua nga ora 11:00 deri në 12:00, duke treguar intensitetin e jashtëzakonshëm të motit në atë zonë.