Shiu i rrëmbyeshëm që ra këtë pasdite në Manastir shkaktoi vërshime në disa rrugë dhe vendbanime të ndryshme, duke penguar funksionimin normal të qytetit. Komuna e Manastirit njoftoi se ekipet e NP "Niskogradba" janë në terren dhe po ndërhyjnë në zona të ndryshme, përfshirë rrugën "8 Shtatori", vendbanimin Karposh-Klanica, rrugën "Zhelezniçka" pranë "Imperatorit", si dhe në lumin Kurderes dhe kanalin e kullimit në Orizare e Epërme. Ndërhyrje janë bërë edhe në rrugët që çojnë në fshatrat Rashtani, Brusnik dhe Lavci, si dhe në disa zona të tjera ku rrjetat e kullimit nuk kanë mundur të përballojnë sasinë e ujit. Autoritetet vazhdojnë punën për të normalizuar situatën dhe për të parandaluar dëme të mëtejshme.