Në Shqipëri, nga 22 qershori deri më sot janë regjistruar 160 zjarre në të gjithë territorin, prej të cilave 127 kanë qenë në sipërfaqe me bimësi, shkurre dhe kullota. Autoritetet, nën drejtimin e Agjencisë Kombëtare të Mbrojtjes Civile dhe drejtorit Haki Çako, kanë zhvilluar një mbledhje koordinuese për të forcuar bashkëpunimin ndërinstitucional dhe për të menaxhuar më mirë sezonin e zjarreve. Të gjitha strukturat operacionale, përfshirë Policinë e Shtetit, shërbimin zjarrfikës, Urgjencën Kombëtare dhe Forcat e Armatosura, janë në gatishmëri të plotë dhe kanë kapacitetet e nevojshme për ndërhyrje të shpejtë. Megjithatë, drejtori Çako thekson se pa bashkëpunimin aktiv të qytetarëve dhe sinjalizimin në kohë të vatrave të zjarrit, përpjekjet institucionale nuk do të jenë të mjaftueshme për të minimizuar dëmet dhe për të garantuar sigurinë e qytetarëve dhe turistëve gjatë sezonit veror.